विकास योजना
भविष्यातील उपक्रम : देवगडमधील अनुभवजन्य शिक्षण
कोकण प्रदेशातील समृद्ध नैसर्गिक साधनसंपत्ती, विस्तीर्ण समुद्रकिनारा आणि वैशिष्ट्यपूर्ण जैवविविधता लक्षात घेता, आमच्या संस्थेचे भविष्यातील उपक्रम केवळ पारंपरिक पाठ्यपुस्तकाधारित शिक्षणापुरते मर्यादित राहणार नाहीत. विद्यार्थ्यांना प्रत्यक्ष अनुभवातून शिकता यावे, यासाठी विविध नाविन्यपूर्ण उपक्रमांच्या माध्यमातून अनुभवजन्य शिक्षण (Experiential Learning) देण्याचा आमचा मानस आहे.
कृषी-आधारित शैक्षणिक प्रकल्प (Agri-Education Projects)
कोकण प्रदेश हा हापूस आंबे, काजू, नारळ आणि सुपारी यांसाठी जागतिक स्तरावर प्रसिद्ध आहे. या भागातील कृषी क्षेत्राचे महत्त्व लक्षात घेऊन संस्थेने पुढील शैक्षणिक प्रकल्प राबविण्याची दूरदृष्टी ठेवली आहे.
1) शालेय रोपवाटिका:
वनस्पती संवर्धन, कलम बांधणी, माती परीक्षण आणि सेंद्रिय खत (कंपोस्ट) निर्मिती याबाबत विद्यार्थ्यांना प्रत्यक्ष प्रशिक्षण देणे.
2) परसबाग व औषधी वनस्पती:
परसबाग व औषधी वनस्पतींची लागवड करून, प्रत्येक वनस्पतीची सविस्तर माहिती देणारी डिजिटल क्यूआर कोड बाग विकसित करणे.
पर्यावरण व जैवविविधता (Environment and Biodiversity)
कोकण प्रदेश जैवविविधतेने समृद्ध आहे. या क्षमतेची जाणीव ठेवून संस्थेने पुढील निसर्गाधारित प्रकल्प राबविण्याचे ध्येय निश्चित केले आहे.
कोकण जैवविविधता केंद्र: पश्चिम घाटातील दुर्मिळ वनस्पती, प्राणी व पक्षी प्रजातींची माहिती देणारे एक लघुसंग्रहालय (Mini Museum) उभारणे.
मत्स्यव्यवसाय व सागरी विज्ञान (Fisheries and Marine Science)
शेती आणि निसर्गसंपत्ती यापलीकडे कोकणाला ७२० किमी लांबीची समुद्रकिनारपट्टी लाभलेली आहे. या सागरी भौगोलिक वैशिष्ट्याचा शैक्षणिक हेतूसाठी उपयोग करून सागरी क्षेत्रात रोजगार निर्मितीस चालना देणारे कौशल्याधारित शिक्षण देण्याचे संस्थेचे उद्दिष्ट आहे.
मत्स्यपालन प्रकल्प : छोट्या स्वरूपातील मत्स्यपालन केंद्र (अॅक्वेरियम किंवा तळे)स्थापन करून मत्स्यपालनाचे शास्त्रीय व आर्थिक पैलू विद्यार्थ्यांना समजावून देणे.
कौशल्य विकास व व्यावसायिक प्रशिक्षण
आधुनिक युग हे कौशल्य आणि तज्ज्ञतेवर आधारित आहे याची जाणीव ठेवून, संस्थेने कौशल्यविकास आणि व्यावसायिक शिक्षणासाठी समर्पित अशा पुढील उपक्रमांची योजना आखली आहे.
1) अन्नप्रक्रिया प्रशिक्षण केंद्र : आंबा व फणसापासून आंबापोळी, जॅम, लोणची यांसारख्या मूल्यवर्धित पदार्थांची निर्मिती करण्याचे प्रत्यक्ष प्रशिक्षण देणारे केंद्र.
2) कोकणात विकसित होऊ घातलेल्या बंदरांतील रोजगाराच्या संधी लक्षात घेऊन, त्या ठिकाणी काम करण्यास सक्षम असे कुशल कामगार व तांत्रिक तज्ज्ञ (Technicians) घडवणे हे आमचे प्रमुख ध्येय आहे.
पर्यटन व आदरातिथ्य व्यवस्थापन (Tourism & Hospitality Management)
कोकणात पर्यटन व्यवसाय झपाट्याने वाढत असून, हे लक्षात घेऊन आमच्या संस्थेमार्फत ज्युनिअर कॉलेज स्तरावर कौशल्याधारित अभ्यासक्रम राबवले जाणार आहेत.
1) टूर गाईड प्रशिक्षण : विजयदुर्ग, सिंधुदुर्ग यांसारख्या ऐतिहासिक किल्ले तसेच प्रमुख पर्यटन स्थळांची माहिती देणारे व्यावसायिक प्रशिक्षण अभ्यासक्रम.
2) होम-स्टे व्यवस्थापन : आदरातिथ्य क्षेत्रात रोजगार व स्वयंरोजगारासाठी स्थानिक युवकांना तयार करणारे लघुकालीन प्रमाणपत्र अभ्यासक्रम.
